وصية ابويا الجزء الاول صابرين محمد
أبويا قاطعني عشر سنين عشان أطلق مراتي، ولما رفضت أبيعها عشان أرضيه، قرر يحرمني من بيتي وورثي لكن اللي وجع قلبي بجد إنه قبل ما يكتب وصيته، خصّني أنا بطلب عمري ما تخيلت إنه ممكن يطلبه من ابنه!
عمري ما تخيلت إن يوم من الأيام هقف بين أهلي ومراتي، وأبقى مطالب أختار بين إني أحافظ على بيتي وولادي، وبين إني أخسر أبويا وأمي. أنا كنت متجوز وعندي ابن وثلاث بنات، وعايش مع مراتي في بيت العيلة، وحياتنا كانت مستقرة، ومراتي كانت بتعامل أبويا وأمي أحسن معاملة، لدرجة إنهم كانوا معتمدين عليها في كل حاجة.
كانت بتصحى من بدري تساعد حماتها في شغل البيت، وتحضر الأكل وتخلص طلباتهم، وبعدها تطلع شقتها تهتم ببيتها وعيالها. وعلاقتنا بالعيلتين كانت كويسة، خصوصًا إن فيه صلة قرابة بين أهلنا، وأخو مراتي كان صاحب أخويا الصغير، والاتنين كانوا قريبين من بعض جدًا.
لحد اليوم اللي حصلت فيه الحادثة اللي قلبت حياتنا كلها.
أخويا الصغير كان في مدرسة الصنايع، وأخو مراتي كان معاه في نفس المدرسة، لكنه أكبر منه بسنة. وفي يوم راحوا فرح في بلد قريبة مع شوية أصحابهم، وبعد ما الفرح خلص، ركبوا الموتوسيكلات عشان يرجعوا، وفضلوا يسابقوا بعض في الطريق، كل واحد يحاول يسبق التاني.
وفجأة، ظهرت عربية في طريقهم!
أخويا كان متقدم بموتوسيكله وبيجري بسرعة، وأخو مراتي كان وراه، وفي لحظة العربية خبطت أخويا بقوة ووقعته هو والموتوسيكل على الأرض.
أخو مراتي أول ما شاف صاحبه واقع، رمى موتوسيكله وجري عليه، وبقية الشباب نزلوا يساعدوه، وشالوه ونقلوه المستشفى بسرعة. في البداية كنا فاكرين إن الإصابة مش خطيرة، لكن الفحوصات وضحت إن فيه إصابة شديدة في الجمجمة والمخ، وإن حالته حرجة.
أبويا وأمي وصلوا المستشفى، ولما عرفوا إن الشباب كانوا بيسابقوا بعض، أبويا فقد أعصابه، ومسك في أبو أخو مراتي وهو بيصرخ
ابنك قتل ابني! ابنك هو السبب في اللي حصل
الناس حاولت تهديه وتفهمه إن الاتنين كانوا أصحاب وبيسابقوا بعض، وإن محدش كان قاصد يأذي التاني، لكن أبويا كان في حالة صدمة وغضب، ومكنش قادر يسمع أي كلام.
وبعد كام يوم، جه الخبر اللي كنا خايفين منه... أخويا مات متأثر بإصابته.
ومن اللحظة دي أبويا وأمي قرروا إن أخو مراتي هو السبب وإن لازم يدفع تمن موت ابنهم، رغم إن التحقيقات وسماع أقوال السواق والشباب اللي كانوا موجودين أثبتت إنه مكنش له ذنب في الحادث، وإنه كان من أوائل الناس اللي حاولوا ينقذوا أخويا وينقلوه المستشفى.
لكن أهلي رفضوا يصدقوا أي دليل وقرروا إن التمن اللي لازم أدفعه أنا هو إني أطلق مراتي
الموضوع مبدأش بالكلام بس. أبويا وأمي طلعوا شقتي وفضلوا يزعقوا لمراتي ويتهموها إن أهلها السبب في موت أخويا، وحاولوا يخرجوها من الشقة. ولما وقفت أدافع عنها، أبويا هددني إنه لو مطلقتهاش هيتبرأ مني.
مراتي اضطرت تكلم أهلها، وجم أخدوها هي والعيال، وبعدها أهلي خيروني بين إني أطلقها وأرميها عند أهلها، وبين إني أخسرهم هما كمان.
حاولت أفهمهم إن مراتي مالهاش ذنب، وإن أخوها كان بيحاول ينقذ أخويا مش يقتله، لكن أبويا ضربني وأمي أهانتني وفي الآخر طردوني من بيت العيلة، ومخلونيش حتى آخد هدومي وحاجتي
روحت قعدت عند أهل مراتي كام يوم، وبعدها استأجرت شقة ونقلت مراتي وعيالي يعيشوا معايا. وبمساعدة عمي الكبير، قدرت أرجع عفشي وحاجتي من بيت العيلة، وبدأت حياة جديدة بعيد عن أهلي.
لكن رغم كل اللي حصل، مكنتش عايز أخسر أبويا وأمي، وفضلت أحاول أصالحهم.
روحت لهم أنا ومراتي وكانت مستعدة تعمل أي حاجة عشان ترجع العيلة زي الأول. لدرجة إنها ركعت على رجلها رجل أمي وفضلت تترجاها تسامحها لكن أمي ضربتها بالشبشب وطردتها
أهل مراتي نفسهم قالوا لي أطلقها وأخلص من المشاكل، لكن رفضت لأنها ملهاش ذنب في اللي حصل، ومش هقبل إنها تدفع تمن حادثة مكنتش طرف فيها.
فضلت أزور أهلي وأبعت لهم ناس تتوسط، وأحاول أراضيهم، لكن ردهم كان دايمًا واحد
طلق مراتك الأول وبعدها نتكلم
ولما ربنا كرمني بولد تاني، سميته على اسم أبويا على أمل إن قلبه يحن لما يعرف إن حفيده شايل اسمه، لكن حتى دي مغيرتش موقفه.
عدت السنين وأنا لسه بحاول. حتى دهب مراتي بعته وجمعت فلوس عشان أبعتها لأهلي يطلعوا يحجوا، وكنت فاكر إن يمكن ربنا يهدي قلوبهم ويرجعنا لبعض، لكن كل محاولاتي كانت بتفشل.
لحد ما بنتي الكبيرة كبرت واتخطبت.
كان نفسي جدها وأعمامها يكونوا موجودين في فرحتها، ومكنتش عايزها تحس إنها محرومة من أهل أبوها. عشان كده روحت لأبويا مرة تانية وقلت له
يا حاج، بنتك اتخطبت، ونفسي تفرح بيها وتقف جنبي. أنا بقالي عشر سنين بحاول أرضيكم، وكفاية اللي فات بقى.
المرة دي أبويا كان هادي على غير العادة، وقال لي
إحنا ممكن نسامحك وترجع إنت وعيالك بيتنا، ونقف جنبك في جواز بنتك، وكل حاجة ترجع زي زمان.
فرحت من قلبي، إيده وراسه، وقلت له
ربنا يخليك ليا يا حاج، أنا كل اللي نفسي فيه إنك ترضى عني.
لكن قبل ما أمشي، قال لي إن فيه شرط لازم أوافق عليه الأول، وإن من غيره مفيش صلح ولا رجوع.
كنت متخيل إنه هيطلب مني حاجة بسيطة، لكن لما سمعت كلامه، حسيت إن كل السنين اللي فاتت رجعت قدامي مرة واحدة.
أبويا كان عايزني أتجوز على مراتي
وكان مرتب للجوازة بالفعل، وكلم أخوه اللي عنده بنت أرملة وعيالها كبار، وقال إنها هتعيش معايا في بيت العيلة، أما مراتي وعيالي يفضلوا في شقتهم، وأنا أروح أطمن عليهم من وقت للتاني
يعني بعد عشر سنين من وقفة مراتي جنبي، كان المطلوب مني أسيبها لوحدها وأعيش مع واحدة تانية عشان أرضي أهلي.
رفضت وقلت له
يا حاج، مراتي ملهاش ذنب واستحملت معايا كتير، وأنا مش هكافئها على وقفتها جنبي إني أتجوز عليها وأسيبها.
لكن أبويا أصر إن ده الشرط الوحيد، وإنه مش هيحضر فرح بنتي ولا هيسامحني غير لما أوافق.
خرجت من عنده وأنا مش عارف أعمل إيه. مش عايز أخسر أهلي، وفي نفس الوقت مش قادر أظلم مراتي، خصوصًا إنها كانت مستحملة معايا كل السنين دي.
استشرت أكتر من رجل دين، وكلهم قالوا لي إني مش مطالب أطيع أهلي في طلب فيه ظلم لمراتي، لكن كان فيه واحد اقترح عليّ حل إني أوافق على الجوازة وأفضل أزور مراتي الأولى من غير ما أهلي يعرفوا.
رفضت أنا كمان، لأني مش عايز أعيش في كذب، ولا أخلي حياتي كلها أسرار.
رجعت البيت وحكيت لمراتي كل اللي حصل. كانت مصدومة، لكنها قالت لي إنها مش عايزة تكون سبب في حرماني من أهلي، وإن نفسها تشوفهم في فرح بنتنا.
لكن أنا كنت عارف إن الموضوع مش مجرد جوازة تانية وإن أهلي مش هيرجعوني ليهم غير لما أوافق على شروطهم كلها.
حاولت تاني وبعت وساطات، لكن مفيش فايدة. وفي الآخر قرأت فاتحة بنتي وجهزنا للفرح من غير جدها وأعمامها. ورغم الوجع اللي كان جوايا، ربنا عوضني بأعمامي وأصحابي اللي وقفوا جنبي، وبنتي اتجوزت والحمد لله.
كنت فاكر إن كده كل حاجة انتهت، وإن كل واحد فينا هيكمل حياته بعيد عن التاني، لكن بعد فرح بنتي بفترة، وصلني خبر من أبويا خلاني أحس إن المصيبة لسه مخلصتش.
عرفت إنه كتب بيت العيلة لبقية إخواتي، وقرر يحرمني من ورثي، لكن ده مكنش كل اللي عمله.
أبويا كان كتب وصية كمان، وطلب فيها طلب خاص بيا أنا بالذات، وقال إنه مش عايزني أنفذه مهما حصل...
ولما عرفت إن الوصية دي مكتوبة بإيده، وإنه مصرّ عليها، حسيت إن قلبي وقع، وفضلت أسأل نفسي هو أنا عملت إيه لكل ده؟ وإيه اللي ممكن أب يعملُه في ابنه ويكتبه في وصيته؟
يتبع...